Ida ratu saking luhur
Kawula nunas lugrane
Mangda sampun titiang tandruh
Mengayat bhatara mangkin
Titiang ngaturang pejati
Canang suci lan daksina
Sami sampun puput
Pretingkahing saji
Asep menyan majegau
Cendana nuhur dewane
Mangda ida gelis rawuh
Mijil saking luhuring langit
Sampun medabdaban sami
Maring giri meru reko
Ancangan sadulur
Sami pada ngiring
Bhetarane saking luhur
Ngegenah ring ambarane
Penganggene sarwa murub
Parekan sami mengiring
Widyadara widyadari
Pada medudon dudonan
Prabhawa kumetug
Angliwer ring langit
Di bale manike luwung
Mapanyengker ring telagane
Kedangingin tunjung putih
Tunjung abang tunjung putih
Ring madyaning bale alit
Ida bhatara mebawos
Nganggit sekar jepun
Sekar sane wangi
Ring bale emase parum
Linggih ida bhetarane
Bale emas ngranyab murub
Upacara sarwa luwih
Leluhure sutra putih
Ida bhatara mabawos
Bawose di luhur
Pacang turun gelis
Asep pejati wus katur
Mendak ida bhetarane
Peneteg lan canang harum
Canang gantal canang sari
Parekan pada menangkil
Pedak sami nunas ica
Nyadpada menyungsung
Ngaturang pelinggih
Google Play:
