Rig Veda I.43

1, 2, 4-6: rudra;
3: mitra, rudra, varuṇa;
7-9: soma

 

I.43.1

कद्रु॒द्राय॒ प्रचे॑तसे मी॒ळ्हुष्ट॑माय॒ तव्य॑से ।

वो॒चेम॒ शंत॑मं हृ॒दे ॥

kat rudrāya pra-cetase mīḷhuḥ-tamāya tavyase ǀ

vocema śam-tamam hṛde ǁ 

I.43.2

यथा॑ नो॒ अदि॑तिः॒ कर॒त्पश्वे॒ नृभ्यो॒ यथा॒ गवे॑ ।

यथा॑ तो॒काय॑ रु॒द्रियं॑ ॥

yathā naḥ aditiḥ karat paśve nṛ-bhyaḥ yathā gave ǀ

yathā tokāya rudriyam ǁ

I.43.3

यथा॑ नो मि॒त्रो वरु॑णो॒ यथा॑ रु॒द्रश्चिके॑तति ।

यथा॒ विश्वे॑ स॒जोष॑सः ॥

yathā naḥ mitraḥ varuṇaḥ yathā rudraḥ ciketati ǀ

yathā viśve sa-joṣasaḥ ǁ

I.43.4

गा॒थप॑तिं मे॒धप॑तिं रु॒द्रं जला॑षभेषजं ।

तच्छं॒योः सु॒म्नमी॑महे ॥

gātha-patim medha-patim rudram jalāṣa-bheṣajam ǀ

tat śam-yoḥ sumnam īmahe ǁ

I.43.5

यः शु॒क्र इ॑व॒ सूर्यो॒ हिर॑ण्यमिव॒ रोच॑ते ।

श्रेष्ठो॑ दे॒वानां॒ वसुः॑ ॥

yaḥ śukraḥ-iva sūryaḥ hiraṇyam-iva rocate ǀ

śreṣṭhaḥ devānām vasuḥ ǁ

I.43.6

शं नः॑ कर॒त्यर्व॑ते सु॒गं मे॒षाय॑ मे॒ष्ये॑ ।

नृभ्यो॒ नारि॑भ्यो॒ गवे॑ ॥

śam naḥ karati arvate su-gam meṣāya meṣye ǀ

nṛ-bhyaḥ nāri-bhyaḥ gave ǁ

I.43.7

अ॒स्मे सो॑म॒ श्रिय॒मधि॒ नि धे॑हि श॒तस्य॑ नृ॒णां ।

महि॒ श्रव॑स्तुविनृ॒म्णं ॥

asme soma śriyam adhi ni dhehi śatasya nṛṇām ǀ

mahi śravaḥ tuvi-nṛmṇam ǁ

I.43.8

मा नः॑ सोमपरि॒बाधो॒ मारा॑तयो जुहुरंत ।

आ न॑ इंदो॒ वाजे॑ भज ॥

mā naḥ soma-paribādhaḥ mā arātayaḥ juhuranta ǀ

ā naḥ indo vāje bhaja ǁ

I.43.9

यास्ते॑ प्र॒जा अ॒मृत॑स्य॒ पर॑स्मि॒न्धाम॑न्नृ॒तस्य॑ ।

मू॒र्धा नाभा॑ सोम वेन आ॒भूषं॑तीः सोम वेदः ॥

yāḥ te pra-jāḥ amṛtasya parasmin dhāman ṛtasya ǀ

mūrdhā nābhā soma venaḥ ā-bhūṣantīḥ soma vedaḥ ǁ

 

Sumber: https://sri-aurobindo.co.in/workings/matherials/rigveda/01/01-043.htm